Björgun fari ekki í íbúðabyggð

Björgun
Hverfisráð Laugardals bókaði samhljóða í nóvember um að ráðið leggist alfarið gegn öllum hugmyndum um flutning Björgunar í Sundahöfn. Hverfisráðið taldi að starfsemi á borð við starfsemi Björgunar eigi ekki heima í nánd við íbúabyggð og lagði áherslu á aðkomu hverfisráðs að skipulagningu og undirbúningi að hugmyndum að þessu tagi.
Borgarráðsfulltrúar Sjálfstæðisflokksins tóku undir með hverfisráði Laugardals á fundi borgarráðs á fimmtudaginn. Sögðu þeir að starfsemi Björgunar á ekki heima í nánd við íbúabyggð. Þess vegna þarf að færa starfsemina frá Bryggjuhverfinu en engin lausn er að færa hana að annarri íbúabyggð í nágrenni Sundahafnar. Finna þarf starfsemi Björgunar framtíðarstaðsetningu sem allra fyrst.
Ljóst er að Björgun muni fara eitthvað annað þar sem lóðasamningur Björgunar og Reykjavíkurborgar rennur út árið 2016 og hefur Reykjavíkurborg gefið það út að hún muni ekki endurnýja samninginn.