Stanslaust óveður í rekstri borgarinnar

snjor3_015

Stanslaust óveður í rekstri borgarinnar

  • Þjónustu við aldraða, fatlaða og börn er ógnað vegna sinnuleysis meirihlutans.
  • Margt þarf að ganga upp í rekstrinum til þess að fjárhagsáætlun fyrir árið 2016 gangi upp

Á borgarstjórnarfundi í dag fer fram seinni umræða fjárhagsáætlunar Reykjavíkurborgar. Halldór Halldórsson, oddviti borgarstjórnarhóps Sjálfstæðisflokksins fór ekki fögrum orðum um rekstur borgarinnar og sagði í ræðu sinni ma.: Það er skylda okkar að ná tökum á rekstrinum, íbúarnir eiga heimtingu á því að skattfé þeirra sé ráðstafað skynsamlega og forgangsröðun í þágu grunnþjónustu sé skýr – sem hún er ekki í dag.“

Bókun borgarfulltrúa Sjálfstæðisflokksins um fjárhagsáætlun 2016 og fimm ára áætlun.

Forgangsröðun er alvarlega ábótavant hjá meirihluta Samfylkingar, Vinstri grænna, Pírata og Bjartrar framtíðar. Meirihluta þessara fjögurra flokka gengur lítið að taka ákvarðanir sem skipta raunverulegu máli en á gott með að taka ákvarðanir um hin ýmsu gæluverkefni. Nauðsynlegri vinnu við að taka á rekstri borgarinnar árið 2015 hefur verið ýtt yfir á næsta ár þrátt fyrir að fyrir löngu væri ljóst að reksturinn árið 2015 væri í alvarlegri stöðu.

Þjónustu við aldraða, fatlaða og börn er ógnað vegna sinnuleysis meirihlutans. Ekkert er fjárfest í breytingum og nauðsynlegum umbótaverkefnum sem fagfólk hefur í nokkur ár bent á að nauðsynleg séu. Undir stjórn þessa meirihluta belgist kerfið út og það eina sem sést frá meirihlutanum eru óútfærðar niðurskurðarhugmyndir sem samræmast illa þörfum framtíðar. Engin pólitísk stefnumörkun fylgir þessum tillögum heldur er embættismannakerfinu falið að framfylgja þeim.

Þó má lesa út úr greinargerð með 5 ára áætlun að meirihlutinn muni ganga svo langt þegar borgarsjóði þrýtur fé muni fjármögnunin byggast á arðgreiðslum frá fyrirtækjum í B hluta og þá fyrst og fremst Orkuveitu Reykjavíkur.

halldorh_borgarstjorn0209